സംസ്ഥാന വ്യവസായ വാണിജ്യ വകുപ്പ് കേരളത്തിൽ നിന്നുള്ള പ്രധാൻമന്ത്രി ഭക്ഷ്യ സംസ്കരണ സംരംഭങ്ങളുടെ രൂപവൽക്കരണ (പി.എം.എഫ്‌.എം.ഇ) പദ്ധതി ഗുണഭോക്താക്കളുടെ ഉൽപ്പന്നങ്ങൾ പ്രദർശിപ്പിക്കുന്നതിന് വേണ്ടി 2025 മെയ് 22 മുതൽ 24 വരെ എറണാകുളം കലൂർ ജവഹർലാൽ നെഹ്റു ഇൻ്റർനാഷണൽ സ്റ്റേഡിയം ഗ്രൗണ്ടിൽ "പിഎംഎഫ്‌എംഇ-ഫുഡ് ടെക് കേരള 2025' പ്രദർശന മേള സംഘടിപ്പിക്കുന്നു.
കേരളത്തിൽ നിന്നുള്ള പിഎംഎഫ്‌എംഇ ഗുണഭോക്താക്കൾക്ക് മാർക്കറ്റിംഗ് പിന്തുണ നൽകുന്നതിനും പിഎംഎഫ്‌എംഇ പദ്ധതിയെക്കുറിച്ച് പൊതുജനങ്ങളിൽ അവബോധം സൃഷ്ടിക്കുന്നതിനുമായാണ് പ്രസ്തുത പ്രദർശനം സംഘടിപ്പിക്കുന്നത്.

കൊച്ചി, കലൂർ ജവഹർലാൽ നെഹ്‌റു അന്താരാഷ്ട്ര സ്റ്റേഡിയം ഗ്രൗണ്ടിൽ പ്രത്യേകം തയ്യാറാക്കിയ വേദിയിൽ 2025 മെയ് 22 ന് രാവിലെ 11.00 മണിക്ക് ബഹു. നിയമ, വ്യവസായ, കയർ മന്ത്രി ശ്രീ. പി. രാജീവ് പ്രദർശനം ഉദ്ഘാടനം ചെയ്യും.
3 ദിവസമായി സംഘടിപ്പിക്കുന്ന പ്രദർശന മേളയിൽ ഭക്ഷ്യ സംസ്കരണത്തിനുള്ള സാങ്കേതികവിദ്യകൾ, ഉപകരണങ്ങൾ, ഭക്ഷ്യ ഉത്പന്നങ്ങളുടെ ചില്ലറ വിൽപ്പന, പാൽ ഉത്പന്നങ്ങൾ, പാനീയങ്ങൾ, സംസ്കരിച്ച ഭക്ഷണ ഉത്പന്നങ്ങൾ, ശുചിത്വവും ആരോഗ്യകരവുമായ ഭക്ഷണങ്ങൾ, പാക്കേജിംഗ് തുടങ്ങിയവയുടെ വിശാലമായ ശ്രേണി ശക്തി പകരും. പിഎംഎഫ്‌എംഇ ഫുഡ്‌ടെക് കേരള പ്രദർശന മേളക്കൊപ്പം വിവിധ സെഷനുകളും സംഘടിപ്പിക്കും. കേരളത്തിലെ ഭക്ഷ്യ സംസ്‌കരണ മേഖലയിലെ ഉത്പാദകരും ഉപഭോക്താക്കളും സംരംഭകരും ഒരേ വേദിയിൽ കണ്ടുമുട്ടുന്നതിനും ബിസിനസ്സ് വളർച്ചക്ക് അവസരമൊരുക്കുന്നു എന്നതുമാണ് പിഎംഎഫ്‌എംഇ ഫുഡ് ടെക് കേരളയെ വ്യത്യസ്തമാക്കുന്നത്.

കേന്ദ്ര സർക്കാരിന്റെ ഭക്ഷ്യ സംസ്കരണ വ്യവസായ മന്ത്രാലയം ആത്മ നിർഭർ ഭാരത് അഭിയാന്റെ ഭാഗമായി സംസ്ഥാനങ്ങളുമായി സഹകരിച്ച് ഭക്ഷ്യ സംസ്കരണ മേഖലയിലെ സംരംഭങ്ങളുടെ ഉന്നമനം ലക്ഷ്യമിട്ട് സാമ്പത്തിക, സാങ്കേതിക, വിപണന പിന്തുണ നൽകുന്നതിനായി രൂപവത്കരിച്ച കേന്ദ്രാവിഷ്കൃത പദ്ധതിയാണ്‌ പ്രധാൻമന്ത്രി ഭക്ഷ്യ സംസ്കരണ സംരംഭ രൂപവൽക്കരണ പദ്ധതി (പി.എം.എഫ്‌.എം.ഇ സ്കീം). ഈ പദ്ധതിയിലൂടെ സൂക്ഷ്മ ഭക്ഷ്യ സംസ്കരണ സംരംഭങ്ങൾക്കു സാമ്പത്തിക, സാങ്കേതിക, ബിസിനസ്സ് പിന്തുണ ലഭിക്കുന്നതാണ്. കേന്ദ്ര സർക്കാർ സംസ്ഥാന സർക്കാരുമായി സഹകരിച്ച്‌ 60:40 എന്ന അനുപാതത്തിലാണ്‌ പദ്ധതി നടപ്പാക്കുന്നത്‌.

വ്യക്തിഗത സൂക്ഷ്മ ഭക്ഷ്യ സംസ്കരണ സംരംഭങ്ങൾ/ പ്രൊപ്രൈറ്റർഷിപ്പ് സ്ഥാപനങ്ങൾ / പാർട്ണർഷിപ്പ് സ്ഥാപനങ്ങൾ - യൂണിറ്റിന് പരമാവധി 10 ലക്ഷം രൂപ വരെ യോഗ്യതയുള്ള പ്രോജക്റ്റ് ചെലവിന്റെ 35% ക്രെഡിറ്റ് ലിങ്ക്ഡ് ഗ്രാന്റ് (ഗുണഭോക്തൃ വിഹിതം പ്രോജക്റ്റ് ചെലവിന്റെ 10% ആണ്, ബാക്കി ബാങ്കിൽ നിന്നുള്ള വായ്പയാണ്) ലഭ്യമാക്കുന്നു.